OZONOTERAPİYA
Ozonoterapiya xəstə orqanizmin müalicəsində dəstəkləyici terapiya kimi uğurla tətbiq olunur. Həm oksigen molekulu, həm də atomar oksigen orqanizmdə gedən patoloji proseslərə öz müsbət təsirini göstərir. Ozonoterapiya qan dövranını yaxşılaşdırır, damar divarlarının elastikliyini bərpa edir və immun sistemini stimullaşdırır. Bu müalicə zamanı qanın detoksikasiya, yəni zərərli birləşmələrdən təmizlənmə potensialı yüksəlir. Ozonoterapiya həm də toxumaların qidalanmasını, regenerasiya prosesini yaxşılaşdırır, yaraların sağalmasını tezləşdirir, qırmızı qan hüceyrələrinin divarının elastikliyinə təsir edir. Bu, iltihab əleyhinə, bakteriya, göbələk və virus infeksiyalarına qarşı effektli terapiyadır.
Ozonoterapiya, eyni zamanda dəri xəstəliklərinin, kosmetoloji problemlərin, allergiyaların, ürək-qan damar, həzm sistemi orqanlarının, ginekoloji və uroloji xəstəliklərin müalicəsində də istifadə edilir. Şəkərli diabet, trofiki xoralar, immunitet zəifliyi, depressiya, stres və yaddaş pozulmasından əziyyət çəkən insanlara da yüksək müalicəvi təsir göstərir. Bu müalicə metodunun viruslara məhvedici təsiri tədqiqatlarla sübut edilmişdir. Ozonoterapiya müasir dövrün aktual problemi olan xroniki yorğunluq sindromu müalicəsinin əsas hissəsini təşkil edir.
Qeyri düzgün həyat tərzi və qapalı məkanda uzunmüddətli iş insan beynini yorur, orqanizmdə gedən bioloji proseslər oksigen aclığına məruz qaldığından natamam parçalanan məhsullar tədricən bizim bədənimizdə toplanır. Bu da xroniki yorğunluq, tez yorulma, halsızlıq, yuxululuq, diqqət zəifliyi kimi əlamətlərlə özünü göstərir.
Ozonoterapiya prosedurları bir neçə formada həyata keçirilir. Almaniya və İtaliya üsulu ilə aparılan böyük auto-hemo ozonoterapiya Almaniya istehsalı olan cihaz vasitəsilə həyata keçirilir. Pasiyentdən 150 və ya 300 ml qan alınaraq ozonla qarışdırılır, bu zaman ozon molekulyar və atomar oksigenə parçalanır və eritrositlərlə birləşərək qanın oksigenlə zənginləşməsini təmin edir. Bu üsul müxtəlif xroniki xəstəlikləri olan və hipoksiyadan əziyyət çəkən xəstələr üçün həm müalicəvi, həm də profilaktik məqsədlə çox effektivdir.
Ozonoterapiyanın müalicəvi effekti mütəxəssis tərəfindən düzgün təyin edilmiş dozadan asılıdır. Sadalanan hər bir hala uyğun olaraq ozonun dozası fərdi olaraq seçilir.
